Sunday, October 5, 2025

തഞ്ചാവൂർ പോവാം...

 ഓരോ യാത്രയും മനോഹരമാവുന്നത് യാത്രയുടെ ലക്ഷ്യം കൊണ്ടോ അതിന്റെ ദൈർഘ്യം കൊണ്ടോ മാത്രമല്ല... മറിച്ച് ആ യാത്രയിൽ കൂടെയുള്ള മനുഷ്യരെ കൊണ്ട് കൂടിയാണ്... അവരോടൊപ്പം ചെലവഴിക്കുന്ന നല്ല കുറച്ചു നിമിഷങ്ങൾ കൊണ്ട് കൂടിയാണ്...


പ്രത്യേകിച്ച് യാതൊരു പ്ലാനിങ്ങുമില്ലാതെ, എന്നാൽ ഏറെ ആഗ്രഹിച്ചതുമായ ഒരു യാത്രയായിരുന്നു അത്... രാത്രിയിലെ ചെന്നൈ മെയിലിന്റെ പിന്നാലെയുള്ള ഓട്ടത്തിൽ തുടങ്ങി, രണ്ടാം ദിനം ആലപ്പുഴ എക്സ്പ്രസ്സിനു വേണ്ടിയുള്ള ഓട്ടത്തിനിടയിൽ ചെലവഴിച്ച പത്തുനാൽപ്പത് മണിക്കൂർ... അതിനിടയിൽ കഥപറഞ്ഞും പരസ്പരം കളിയാക്കിയും ഓടിചാടി നടന്നും തലക്കു മുകളിൽ കത്തി നിൽക്കുന്ന സൂര്യനെ പഴിച്ചും ഏറെ നേരം ചിരിച്ചും ചിരിപ്പിച്ചും പാട്ടുപാടിയും കടന്നുപോയ നിമിഷങ്ങൾ... ഈ യാത്ര യഥാർത്ഥത്തിൽ എവിടെയോ നഷ്ടപ്പെട്ടുപോയ നല്ല കുറച്ച് ഓർമ്മകളെ തേടിയുള്ളതായിരുന്നു....


ചോളസാമ്രാജ്യത്തിന്റെ ചരിത്രമുറങ്ങുന്ന മണ്ണിൽ ചെന്ന് അവിടെയുള്ള കാഴ്ചകൾ പൂർണമായും കാണാനായില്ലയെങ്കിലും ഇനിയും യാത്രകൾ തുടരും എന്ന തീരുമാനവുമായാണ് നാം തിരിച്ചു പോരുന്നത്... 


യാത്ര കഴിഞ്ഞ് തളർന്നു വീട്ടിൽ ചെന്ന് കയറുമ്പോൾ കൂടെയുള്ളത് മുഷിഞ്ഞ തുണികളും ഒഴിഞ്ഞ പേഴ്സും മാത്രമല്ല... ഒരുപാട് നല്ല നിമിഷങ്ങളാണ്... ആ സമയത്തോളം ഭംഗി അവകാശപ്പെടാനാവില്ലെങ്കിലും ഒട്ടും ചന്തം കുറഞ്ഞിട്ടില്ലാത്ത ഒരുകൂട്ടം ചിത്രങ്ങളാണ്...


കൂടുമ്പോൾ ഇമ്പമുണ്ടാവുന്ന കുടുംബം പോലെ, എന്നും ഒപ്പമുണ്ടാവുമെന്ന് സ്വപ്നം കാണുന്ന ഒരുപറ്റം മനുഷ്യരോടൊത്തുള്ള യാത്ര...


" ഇത് നമ്മുടെ തഞ്ചാവൂർ യാത്ര..... "



Monday, July 21, 2025

കണ്ണേ കരളേ...

 കണ്ണേ കരളേ വി.എസ്സേ...


കുട്ടികാലത്ത് ആദ്യമായി ഒരു രാഷ്രീയപ്രവർത്തകന്റെ മുഖം മനസ്സിൽ പതിഞ്ഞുപോയത് സ: വി എസ് അച്യുതാനന്ദന്റെയായിരുന്നു... കേരള മുഖ്യമന്ത്രിയെന്ന് ആദ്യമായി ചൊല്ലി പഠിച്ചതും ആ രണ്ടക്ഷരമായിരുന്നു... നർമ്മം കലർത്തിയ ഭാഷയോടെ, നീട്ടിയും കുറുക്കിയുമുള്ള ആ പ്രസംഗങ്ങൾ ആ മനുഷ്യനെ പ്രിയപ്പെട്ടൊരു നേതാവാക്കി മാറ്റി... പിന്നീട് വളർന്നു വന്നപ്പോൾ, കേരളത്തിന്റെ സമര ചരിത്രവും, പാർട്ടിയുടെ വളർച്ചയുമെല്ലാം പഠിച്ചറിഞ്ഞു തുടങ്ങിയപ്പോൾ മനസ്സിലായി വേലിക്കകത്തു ശങ്കരൻ അച്യുതനന്ദൻ എങ്ങനെ കേരളത്തിന്റെ സ്വന്തം വി എസ് ആയി മാറിയെന്ന്... എവിടെയോ വായിച്ചപോലെ, ഞങ്ങൾ ഇ.എം.എസിനെയോ, എകെജിയെയോ നായനാരെയോ കണ്ടിട്ടില്ല, എന്നാൽ വി എസ്സിന്റെ കാലത്താണ് ഞങ്ങൾ ജനിച്ചതും വളർന്നതും... കണ്ടും കേട്ടുമറിഞ്ഞ കേരള രാഷ്ട്രീയവും വി എസ് എന്ന വ്യക്തിയുടെ കൂടിയായിരുന്നു... ജീവിതം തന്നെ സമരമാക്കിയ, പരിസ്ഥിതിക്കും പാവപ്പെട്ടവനും സ്ത്രീകൾക്കും വേണ്ടി, അവരുടെ നീതിക്ക് വേണ്ടി ശബ്ദിച്ച, തെറ്റ് സ്വന്തം പാളയത്തിൽ കണ്ടാലും വെട്ടി തുറന്ന് പറഞ്ഞിരുന്ന സഖാവ്, ഒരിക്കലെങ്കിലും കാണാണമെന്ന് ആഗ്രഹിച്ച നേതാവ്...കേരളത്തിന്റെ ഫിദൽ കാസ്ട്രോ... ഈ സായാഹ്നത്തിൽ അസ്തമിക്കുന്നത് ഒരു വിപ്ലവയുഗം കൂടെയാണ്...


അന്ത്യാഭിവാദ്യങ്ങൾ പ്രിയ സഖാവേ....




ഓർമ്മപ്പെടുത്തൽ

 ഇരുപതു വയസ്സ്‌ കഴിഞ്ഞ 'മുതിർന്ന കുട്ടികളെ', ഇത് നിങ്ങളോടാണ്.... പ്രായത്തിന്റെ അളവുസൂചികയിൽ ഉത്തരവാദിത്തങ്ങളും ചുമതലകളും തനിയെ വന്നു...